算命不好? (一)

空姐elaine算過命後, 被批為歹命, 留言安慰者眾, 不在話下. 詳情請看這裡.

人出生一刻, 夜觀天象, 就可觀察到各星在各宮位之間產生的影響, 推斷出那人一生中的起伏. 再加上家境等因素, 就大致推得出六七分人生藍圖了.

本來我們一般做事, 能知道多少情報, 就越能做出正確的決定. 就算是一次外遊, 事前都會大量收集當地風土人情, 酒店住宿等資料與安排, 更何況是我們自己的人生了.

但好像elaine那種情況, 我想起"了凡四訓"當中, 雲谷禪師所說的話.

***以下是了凡四訓用廣東話演譯, 有我的rearrange成份, 想看原文請到這裡***

話說袁了凡後生果陣被一個鐵板神數的高手批左佢一生點點點, 邊年考秀才, 到邊年死都一應俱全, 仲批死佢冇仔生, 斷後. 之後無論佢點努力讀書考試, 想考高d名次, 但係點都走唔出本命書寫好既命運, 於是覺得點努力都晒心機, 橫豎都批死左冇得郁, 就決定咩都唔q努力, 順其自然咁話.

有一日佢走左去雲谷禪師果度參禪, 三日三夜都冇瞇埋眼. 如果個人成日胡思亂想, 消耗精神, 係冇可能唔訓覺既. 而好似果陣袁了凡咁可以三日三夜都咁精神, 可以知道佢心無雜念得幾交關. 雲谷禪師見佢咁高境界, 以為佢修為高, 問佢點解,

袁了凡就答喇:"我條命都批死左, 冇得上冇得落, 咪唔期望囉, 唔期望咪唔使失望囉"

雲谷禪師就笑佢:"仲以為你有咩領悟咁高, 原來只係小兒科"

之後佢解釋左一輪, 反問袁了凡, "你自己睇下你自己個款, 個格, 似會中進士, 似有仔生咩?"
袁了凡於是數落左自己好多缺點, 自己都覺得自己冇咩功德, 又臭脾氣, 又有潔癖, 諸如此類. 有得中進士? 有仔生? 咁就冇天理啦.

雲谷禪師就話, "你都知自己衰呢. 咁你就從改善呢d性格方面著手, 務必日日有改善, 再加埋勤念準提咒, 念到功夫純熟, 咁就開始心想事成架啦."

於是了凡跟足指示, 落足功夫, 結果條命越來越好, 本來冇仔既, 都生左兩個仔(呢本書本來就係了凡寫畀個仔既家書), 本來被批死考第三既又畀佢考到第一, 本來應該五十三歲死既, 冇去求壽, 果年居然冇死到, 寫呢本書果陣都成六十九歲.

***廣東話故事完畢***

不論是甚麼算命方法, 都不過是工具, 推測可以預見的將來, 沒有也不會提供改善建議和方法. 尤有甚者, 以算命維生的人為求賺得更多, 往往神化自己, 鐵筆直斷, 沒有轉彎的餘地, 無形中變成算命者主宰了客人的命運, 令客人覺得人生灰暗, 真的十分缺德. 所以佛陀制定八正道, 其中就有明確講到不得以算命維生.