Subscribe

RSS Feed (xml)

Powered By

Skin Design:
Free Blogger Skins

Powered by Blogger

2009年2月2日星期一

不是我的,政治評論

又係一篇已經被洗的文章,本來看都沒看過,只是作者話呢篇文,「好愛你地」,「有錢都買唔到」,所以我要告訴大家,這篇文是「不需要用錢買」了。

不好意思,我恨你們,所以要給你們看看,有心機的請慢用。

如果灰狗見到此文,請留言,我幫你搵番你想要既文,我相信我有齊。


「我想,我有病。

我得了不得罪人就會死的病。」by 朱學恆

以下開始既係,離題。

梁啟智篇文提到,「2007 年區議會選舉後,竟有落選者解釋失敗的原因是不知道選區多了新移民,已是政治地理學的奇聞。然而漠視人口趨勢影響的,又豈止於幾個不懂得使用統計處網站的落選議員?」。

記得早兩個月,佢係自己部落都提及,「這些分析,我 expect 一個大學生的也該懂得做。因此,我 expect 現在參選的 57 張名單,每一張都該有個 chief spatial strategist 在做這個。如果不是,就証明香港的選戰是玩泥沙了」。

佢提及既分析,大約係,人口結構同投票意向既關係(佢用既係,投票比陳太同教育程度既關係)。

************
梁啟智係我貼個篇文章提到既「落選議員」,應該係基哥同佢檔野既油尖旺地保。

不過,梁啟智應該誤會,或唔明基哥講咩。

基哥提到既「多了新移民」或「某些區好似選民換左,某些人之前未見過」(基哥當時接受訪問時既講法)其實係指,有一部份去投票站投票既選民,係基哥(或佢人碼)之前完全未見過,或未有印象。

************
要明白上面講咩,其實要明白基哥、部份白鴿、及最重要既係,整個左派既選戰策略。

************
基哥所講既換左人係咩﹖用最低層次,不過梁啟智或一般人唔知既講法係,有部份選民係「無喇喇登記做選民」。

咩叫「無喇喇登記做選民」﹖你見到而家西九龍區多左好多新屋苑。傳聞,亦都值得相信既係,中銀或其他中資公司買左好多單位做員工宿舍,之後再登記選民(well,衣個係傳聞咋,我咩都唔知架,你信你既事喇。至於基哥提到既另一傳聞,就無謂講喇)。

衣種「無喇喇登記做選民」,係梁啟智用既數據研究中係分析唔到,或有滯後或有其他問題,係好難預測。而事實上,一般既統計資料亦都話唔到比你地聽衣種「登記效應」。例如,關於滯後問題,最近一次人口普查於06年舉行。不過,07年初你仲可以登記「參與」07年尾區議會選舉。

所以,識唔識「使用統計處網站」同輸贏或識唔識分析無關。

************
高層次小小。

咩叫「之前完全未見過」﹖

「之前完全未見過」既相反係「之前全部見過」。冇錯,基哥(特別係公屋區)同左派絕對有能力「見過」每一個選民﹕透過舉行唔同既組織,例如居民協會,佢地閒閒地可以掌握一條大約屋村4千多戶入面過千戶既資料。再透過椿腳、海岸線網絡、或舉辦任何活動收集既居民資料,佢地可以掌握起碼2萬人入面過3千人既資料。而一般屋村投票人數,大約都係3-4千人左右。

(上面既係,假定一條村有4千5戶,每戶4-5人,總人口為2萬人。)

掌握住衣幾千人既資料,係選舉日,佢地大約可以知道或動員到幾多人出黎投票,即俗稱既「數到票」。而新面孔,其實唔難認。

**************
當然,in general,衣個「數到票」度,係屋村方面效果強d。而左派勁在,佢地係私樓都可以「數到票」,下午4點同記者講既,與最後結果只係差幾十票。

(再唔係,睇返李慧驚同梁海岸線最近一次既尊貴選舉,佢地既分票效果真係好利害)

而事實上,好耐之前都係度貼過篇文提到,其實左派係私樓區既社區調查以至部署椿腳都好有系統。咁無論篇文講既係真定假,之但係,事實就係,佢地係有無窮財力及其他政治資源下,佢地真係做得好有系統。

佢地既「椿腳系統」,其實已經取代左spatial strategist既功能。而更加重要既係,其實佢地衣種造法正正係參考外國小區選舉既案例﹕我有完善既社區資料、椿腳配套及地區聯繫,之後再派一個適合既人落去參識已經可以大約估到扲到幾多票,勝選為何。

如果spatial analysis有用,只限於最初分析,或有任何大事件出現時作評估。

(well,當然,上面既唔係恆常做法﹕白鴿有情況就係,冇人呀,是但搵人落去,或,咩呀,我死都要落,唔適合或冇做過野都要落;公民袋既情況就係,亂落喇,是但喇,落仔咁落喇。)

************
題外話。

衣個,其實亦都同灰狗哥個邊,早兩個月,某位人兄好好既見解有關﹕左派贏咁多次補選,係因為佢地既票係跟黨走;泛民咁多次補選都輸,係因為票跟人走--人一走,就輸。

************
又再題外話。

講到衣度,well,大家唔好撲出黎質疑我。大家唔知道,不過睇得衣篇文就要知道既係,基哥同左派最叻攪既「xx村居民協會」,房屋署起碼要個組織扲到一條村既15%戶數(個數字應該冇記錯...)先可以係屋村申請會址。4500戶x15%=675戶=675戶x3=2025人。

如果大家求其睇下各大屋村,見到任何屋村都大把衣d協會就知,扲約700戶既屋民資料其實唔係難事--事實上,我都幾肯定基哥同左派扲既肯定過千戶,即超過4千人喇。

***************
真係最後一次題外話。

衣種數票方法係「ex-ante式數票方法」。某程度上(即係咩程度呀頂﹗),「ex-ante式數票方法」同「灰狗哥ex-post式數票方法」係有同樣邏輯﹕如果你相信選票係可組織,或有一定慣性的話,你可以根據過往投票數據,或手頭上有既選民資料輔以過往數據,去預測選舉結果。

well,其段其實係攪笑,大家可以不理。

***************
睇完上面既野,知道我想講咩未﹖

想講既係,係區議會選舉入面,左派以至基哥係唔需要chief spatial strategist。佢地需要既係,building responsibility manager﹗中文係,每棟大廈既椿腳﹗

與其要透過數據分析人口結構或其他變數對策略既影響,佢地已經唔需要數據分析--佢地要既係同每一個潛在支持自己既選民接觸,再去滿足每個人既需要,或,選取某些佢地可以滿足既選民。

指於立法會選舉需唔需要spatial strategist﹖立法會同區議會選舉,係基哥同左派心目中有分別既咩﹖

********************
當然,其實我學灰狗哥,上面係講d唔講d(common,佢唔知上面既野咩﹖佢知,不過唔講jak)。

其實,梁啟智講既spatial strategist重要性唔係最高,仲有個好重要既原因﹕如果你參選過兩級選舉,你會擁有一隻選民光碟,入面有齊某區選民既地址姓名。

so,you see,點解我上面講既「數票」係可能,或,under certain circumstances,係「最有效率」既選舉部署策略﹖

(This can/may also explain why Fung Kim-Kee, after noticing the sudden growth in the number of registered voters, said the words quoted -- this is of course my guess only as i don't have any details on the voter's profortlio.)

如果我將我居民協會既資料同選民資料對一對,之後再針對動員,之後再「數到票」,咁所有工程,已成。under certain circumstances,衣個係最有效率,或最可靠既動員方式。

*********************
講完,衣方面冇咩好講。

*********************
所以,得閒可以認真留意下,基哥同左派已經變左做旅行社。係衣半年,基哥或其友好每個星期都有3至4個不同旅行團供大家參與。佢做既,就係要「建立社區網絡」--所以,大家以後聽到基哥講衣樣野時,就知佢其實想做咩喇。

而,don't be naive,社民連既「民主蛇宴」就真係食完蛇就算。佢地兩派,食完蛇之後仲大把著數fallow-up。

*********************
當然,上面講既under certain circumstances係咩﹖唔講喇。不過,上面冇講泛民。

唔駛講公民袋喇。佢地連咩係選舉都仲未知。不過,可以用個再簡單既例子,講講點解佢地唔需要spatial strategist,或spatial strategist既重要性唔高。

以 前社福界做例子。假設當時幫佢選既每位都係精兵,位位都有選舉經驗。不過,真係幫佢做野既唔夠廿人(十個都唔知有冇)。好喇,新界西咁大,我知道唔同區有唔同人口結構,唔同區過往投票紀錄唔同。咁,知道又點﹖根本上,佢都冇人同資源去針對唔同區做野。

唔通,佢知道荔景上面既 華景山莊潛在支持度應該高既,咁就走上山宣傳﹖企華景山莊,一日見到1千人,選民應該唔夠4千;企葵涌廣場,一日見到十幾萬人。咁,人手財力有限下,應該邊到做宣傳重點﹖又講到要針對唔同區做宣傳材料,你又有幾多人做﹖

*********************
當然,上面既討論其實簡化左好多野。

例如,我上面張spatital analysis同民意調查混為一談;我亦都冇討論到兩種調查唔同時期既「可能」及「實際」作用。例如,如果第三大黨調查發現不似人君李某人支持度嚴重不足,你話佢會唔會冇得選﹖。

除此之外,我更加冇討論到香港既政制或社會環境點解令到好多調查既重要性都唔強。例如,基哥絕對唔需要衣種調查﹕佢既支持度係建基於「與每一位選民都有緊密既接觸」

當然,更根本既問題係,因為政制及其他傳統等關係,香港既選舉根本上唔係就議題作「政治決斷」。所以,香港既選舉本身就同議題無關。亦所以,好多選舉策略都係多餘--選舉策略係指於選舉期間既策略;平時既政治策略,反而係重要既----所以,如果梁啟會將佢強調既spatital analysis重要性擴展去平時政黨運作,我又會同意佢講既野。

衣個問題,我係上面亦都簡化冇提到喇。

*********************
題外話。

關於「選區多了新移民」,其實又要先攪清楚個概念﹕「唔同政治人係唔同階段認為新移民有何投票取態」。

攪清楚我想講咩未﹖基哥唔會咁低能。不過,據聞某些人係好耐之前曾經「幻想」過,香港越黎越多新移民對泛民有利。因為,新移民多年黎係大陸得唔到自由,黎到香港理應支持民主。

唉,d人而家應該唔會咁諗掛﹖

********************
最後,寫咁多野,漏左幾多最重要既野冇講都好,其實已經講左我想講既野﹕就算香港選戰冇chief spatial strategist都唔係「玩泥沙了」;係唔同情既選舉規模或模式下,亦有可能有其他野代替左衣隻strategist既功能。

至於識唔識去「使用統計處網站」既問題,基哥同各大地保就可能會同你講,我地對深水埗各屋村居民資料既掌握,會多個統計署網站提供既資料。

(當然,to be fair,佢地識唔識去做灰狗哥個隻數票,或有幾多意識去做,或做得好唔好呢,就另一回事。不過,佢地有既係另外幾樣優勢喇。)

********************
講完。

遲下洗左佢。衣d野,想睇,比錢都冇得睇喇。

所以,我幾愛大家。

*******************
橫掂會洗,咁講兩野人口普查既應用問題。

人口普查仲有項好重要,但處理唔到既問題﹕人口普查提供既人口特徵冇話比你聽選民分佈係點。你可能會發現,教育程度同支持泛民係有正關係。而假定某區教育程度偏高,都唔代表你落去會羸--人口普查冇話你聽,某區既選民登記數字同分佈係點。當然,要查某區選民登記百份比呢,又有辦法既。

另外,人口普極有個好重要既數字﹕「五年前是否居於同一居所」。重要性係咩,就明喇。

最後,人口普查應用係選舉入面會有個好困難既操作性問題﹕香港政府鐘意將d票站亂咁掉,屆屆都有唔同,一大一小選舉個票站又可能有分別。所以,政府真係好賤格。

梁啟智好似講過衣個問題。蔡子就肯定講過衣樣野。

沒有留言: